Yeux, qui versez en l'ame, ainsi que deux Planettes,

Un esprit qui pourroit resusciter les morts,

Je sçay dequuoy sont faits tous les membres du corps,

Mais je ne puis sçavoir quelle chose vous estes.

Vous n'estes sang ny chair, et toutefois vous faites

Des miracles en moy par voz regards si forts,

Si bien qu'en foudroyant les miens par le dehors,

Dedans vous me tuez de cent mille sagettes.

Yeux la forge d'Amour, Amour n'a point de trais

Que les poignans esclairs qui sortent de vos raiz,

Dont le moindre à l'instant toute l'ame me sonde.

Je suis, quand je les sens, de merveille ravy :

Quand je ne les sens plus en mon corps, je ne vy,

Ayant en moy l'effect qu'a le Soleil au monde.

Pierre de Ronsard / Les Sonnets pour Hélène