Aquéu vin es bon. — N'en beguen pas trop.

Aquéu vin es dous. — Porto à la batèsto.

Aquéu vin es caud. — Fai vira la tèsto.

Aquéu vin es pur. — Emplissen li got.

Aquest vin es pur. — Es un vin leiau;

Raiè dóu destré de moun brave paire;

Gardo lou perfum goustous dóu terraire:

Lou vin prouvençau pòu pas faire mau.

Ami, se pamens, en levant lou tap,

Vous semblavo ansi de brounzimen d'alo,

Vous esfraiés pas, qu'acò 's la cigalo:

S'encigalaren avans de canta.

Amor qu'es lou biais di calignairisDe faire ploura l'ome que lis amo,

Chourlen lou bon vin, tout soulèu e flamo,

Beguen lou vièi vin qu'assolo e garis.

Li felibre, ai! las! se brulon lou cor;

Barbèlon toujour, pantaiant la glòri;

Carguen après béure un brout de belòri,

E creiren d'avé la cigalo d'or.

Amor que mouri, tau es lou destin,

Dóu tèms que sian viéu, beguen, cambarado!

Que sus noste cros, la caisso barrado,

Un jour li clerjoun plouraran latin.

E s'eilamoundant, se, coume se dis,

Devèn retrouva li jour de jouvènço,

Diguen, en brindant, de nosto Prouvènço:

« Pèr nautre fuguè l'avans-paradis! »

Aquéu vin es bon. — N'en beguen pas trop.

Aquéu vin es dous. — Porto à la batèsto.

Aquéu vin es caud. — Fai vira la tèsto.

Aquéu vin es pur. — Emplissen li got.

Paul Arène / Armana Prouvençau, 1887.