Comment veux-je que l'ame, et foible et desolée,

     Commande à mon desir et corrige mes yeux

     Eschauffez du divin et des forces des cieux,

     Contre qui toute force en vain est esbranlée ?

Comment peut l'ame humaine eschapper afolée

     De la mesme rigueur qui a fait cent fois les dieux

     Perdre leurs dignitez et mourir amoureux ?

     O ame pour jamais destruicte, ensorcelée !

Je veux benir les cieux, Madame, et sa  beauté,

     Je beny mon desir, mes yeux, ma volonté,

     Car ma perte me plaist, je me plais à ma flamme.

Les cieux m'ont fait heureux d'aimer en si haut lieu,

     Madame et sa beauté d'homme me font un dieu,

     Bruslent le corps pour mettre au ciel d'amour son ame.

Agrippa d'Aubigné / L'hécatombe à Diane