CHANSON VII
Par domcorrieras, le dimanche 22 janvier 2012 - Poèmes & chansons - lien permanent
Qui dira ma robe fourree
De la belle pluye doree
Qui Daphnes* enclose ebranla :
Je ne sçay rien moins, que celà.
Qui dira qu'à plusieurs je tens
Pour en avoir mon passetemps,
Prenant mon plaisir çà, et là :
Je ne sçay rien moins, que celà.
Qui dira que t'ay revelé
Le feu long temps en moy celé
Pour en toy veoir si force il a :
Je ne sçay rien moins, que celà.
Qui dira que, d'ardeur commune
Qui les Jeunes gentz importune,
De toy je veulx et puis holà !
Je ne sçay rien moins, que celà.
Mais qui dira, que la Vertu,
Dont tu es richement vestu,
En ton amour m'estincellà :
Je ne sçay rien moins, que celà.
Mais qui dira que d'amour saincte
Chastement au cueur suis attaincte,
Qui mon honneur onc ne foulà :
Je ne sçay rien moins, que celà.
..........................
*Pour séduire Danaé, que son père avait enfermée (enclose) dans une tour, Zeus prit la forme d'une pluie d'or.
Pernette du Guillet (vers1520 -1545) / Rymes de gentille et vertueuse Dame D. Pernette du Guillet, lyonnoise.